Sunday 12 August 2012

'എമെര്‍ജിംഗ് കേരള ' -കേരളത്തെ തകര്‍ക്കുന്ന മുതലാളിത്ത വികസന ആഭാസത്തെ ചെറുത്തു തോല്‍പ്പിക്കുക


2012 ഓഗസ്റ്റ്‌ 12 നു എറണാകുളത്തു ചേര്‍ന്ന  'എമെര്‍ജിംഗ് കേരള ' ക്കെതിരായ ജനകീയ കൂട്ടായ്മ രൂപീകരണ യോഗത്തില്‍ അംഗീകരിച്ച പ്രമേയം 

ഇന്ത്യ അതിന്‍റെ 65 )൦ സ്വാതന്ത്ര്യം ആഘോഷിക്കാനിരിക്കുകയാണ് . എന്നാല്‍ കേരളത്തെ ആഗോള മുതലാളിത്ത സമ്പദ് ഘടനയോടും സാമ്രാജ്യത്ത - പ്രത്യേകിച്ച് യു . എസ് സാമ്രാജ്യത്ത പുത്തന്‍ കൊളോണിയല്‍ അധികാര ആധിപത്യത്തോട്‌ ഇനിയും കൂടുതല്‍ 'മെര്‍ജ്ജു' ചെയ്യാന്‍  (സംയോജിപ്പിക്കാന്‍ ) ഉള്ള തദ്ദേശ വൈദേശിക അധികാര ശക്തികളുടെ ഗൂഢാലോചനയുടെ ഭാഗമായി സെപ്റ്റംബര്‍ 12 , 13 , 14  തിയ്യതികളില്‍ കേരളത്തെ വികസിപ്പിക്കാനെന്ന പേരില്‍  ' എമെര്‍ജിംഗ് കേരള ' മുതല്‍ മുടക്ക് സംഗമം എന്ന വിരോധാഭാസം അരങ്ങേറുകയാണ് .  

ഒട്ടും പ്രത്യുല്പാദനപരമല്ലാത്ത, അതേ സമയം കേരളത്തിന്‍റെ സമ്പുഷ്ടമായ വിഭവ സമ്പത്തുകളെയും , സമ൪ത്ഥവും  വിപുലവുമായ മാനവ  വിഭവ ശേഷി യെയും കൊള്ളയടിക്കാനും പ്രകൃതി രമണീയതയെ ചൂഷണം ചെയ്യാനും മാത്രം ഉദ്ദേശിച്ചു കൊണ്ടുള്ള പദ്ധതികളാണ്  ഇതില്‍ മുന്നോട്ടു വെക്കപ്പെടുന്നത് . വിവധ തരം ടൂറിസം ആണ് ഒരു പ്രധാന ഇനം . ഔട്ട്‌ സോര്‍സിങ്ങും മറ്റും അതിനു താഴെയായി വരുന്നു. ഇവക്കാവശ്യമായ അടിസ്ഥാന സൌകര്യങ്ങള്‍ ഒരുക്കുക എന്നതും ഈ വികസന പ്രക്രിയയുടെ ഭാഗമാണ് . അതിനുള്ള നിയമ ഭേദഗതികളും നിര്‍മ്മാണങ്ങളും നേരത്തെ തന്നെ വരുത്തി കഴിഞ്ഞു . രൂക്ഷമായ വ്യവസ്ഥാ പ്രതിസന്ധിയിലും തകര്‍ച്ചയിലും അകപ്പെട്ടിട്ടുള്ള ആഗോള മുതലാളിത്ത സമ്പത്ത് ഘടനയുമായി കൂടുതല്‍ കൂട്ടി കെട്ടുന്ന ഈ വികസന പദ്ധതി കേരളത്തിന്‍റെ തനതായ ഭൌമ സംതുലിതാവസ്തയെയും , പരിസ്ഥിതിയെയും , സംസ്കാരത്തെയും , മനോഘടനയെ തന്നെയും തകിടം മറിക്കുന്നതും ജീര്‍ണ മാക്കുന്നതും  ആണ് . മുന്‍ കാലങ്ങളിലെന്നപ്പോലെ  കേരളത്തിന്‍റെ യഥാര്‍ഥ വികസനത്തെയല്ല  വിനാശത്തെയായിരിക്കും ഇത് പ്രതിനിധാനം ചെയ്യുക എന്ന് ഈ യോഗം വിലയിരുത്തുന്നു . അത് കൊണ്ട് തന്നെ സാമ്രാജ്യത്വ കടവും മുതല്‍ മുടക്കും കൊണ്ട് പരാശ്രിതവും തകര്‍ന്നു കൊണ്ടിരിക്കുന്നതുമായ കേരളത്തെ കൂടുതല്‍ നാശോന്മുഘമാക്കുന്ന 'എമെര്‍ജിംഗ് കേരള ' മുതല്‍ മുടക്ക് മേള ക്കെതിരായി ഈ യോഗം അതിന്‍റെ ശക്തമായ എതിര്‍പ്പ് രേഖപ്പെടുത്തുന്നു . കേരളത്തെ തകര്‍ക്കുന്ന മുതലാളിത്ത വികസന ആഭാസത്തെ ചെറുത്തു തോല്‍പ്പിക്കാന്‍ രാജ്യ സ്നേഹികളും ജനാധിപത്യവാദികളും വിപ്ലവകാരികളും-ശക്തികളും അണിനിരക്കണമെന്നു ഈ യോഗം ആഹ്വാനം ചെയ്യുന്നു 

1 comment:

  1. ആരൊക്കെ ചേര്‍ന്നാണ് ഈ കൂട്ടായ്മ ? എന്തായാലും നല്ല ഉദ്യമം.

    ReplyDelete